मुंबई : मुंबईमध्ये खड्डे नसल्याचा दावा महापालिकेकडून वारंवार केला जातो. त्यातच बीएमसीने रस्त्यावर ‘खड्डे दाखवा आणि पैसे कमवा’ अशी योजना सुरु करण्याचा निर्णय घेतला आहे. या योजनेची अंमलबजावणी आज 1 नोव्हेंबर पासून केली जाणार आहे. मात्र खड्ड्याच्या आकारमानाबाबत अटी-शर्थी लागू करुनच ही योजना प्रत्यक्षात उतरणार आहे.
मुंबईत महापालिका कोट्यवधी रुपये खर्च करुन रस्ते बांधतात. मात्र, रस्तांवर पडलेल्या खड़्ड्यांमुळे महापालिकेवर टिकेची झोड उठवली जाते. दरवर्षी पावसाळ्यात मुंबईतील रस्त्यांवर खड्डे पडल्याचा अनुभव प्रत्येक मुंबईकराने घेतला आहे. कधी हॉटमिक्स तर कधी कोल्डमिक्स टाकून खड्डे बुजवल्याचा दावा केला जातो, मात्र रस्त्यावर खड्डे आहेत तसेच पुन्हा दिसतात. खड्डे ट्रॅकिंग अॅप, व्हॉट्सअॅप, ट्विटर अशा विविध सोशल मीडियांतून मुंबईच्या रस्त्यावर पडलेले खड्डे पालिकेला दाखवा, असं आवाहन करण्यात आलं आहे.
मुंबईमधील रस्त्यांवर खड्डे आजही तसेच असल्याने अखेर महापालिका प्रशासनाने नागरिकांना खड्डे निदर्शनास आणण्याचे आवाहन केले आहे. एक फूट लांब आणि तीन इंच खोल असलेल्या खड्डयाचा फोटो काढून पालिकेच्या खड्ड्यांच्या ट्रॅकिंग अॅपवर पाठवायचा आहे.
हा खड्डा 24 तासात बुजवला गेला नाही, तर संबंधित विभाग कार्यालयाने खड्डा निदर्शनास आणणाऱ्या नागरिकाला 500 रुपये द्यायचे आहेत. पालिका आयुक्तांनी सर्व विभाग कार्यालयातील सहाय्यक आयुक्तांना असा संदेश पाठवला आहे.
पाचशे रुपये कमवण्यासाठी महापालिकेच्या या आहेत अटी…
1.नागरिकांनी दाखवलेला खड्डा कमीत कमी 1 फूट लांब आणि 3 इंच खोल पाहिजे
2.तक्रारीनंतर 24 तासांत खड्डा भरला गेला, तर पैसे मिळणार नाहीत.
3.खड्डे दाखवा, पैसे मिळवा या योजनेचा लाभ घेण्यासाठी ‘My BMC pothole fixlt’ या अॅपवर जाऊन खड्ड्यांची तक्रार नोंदवावी लागेल