नवी दिल्ली : दिल्ली विधानसभेसाठी सत्ताधारी आम आदमी पार्टीने (आप) मंगळवार ( १४ जानेवारी ) सर्व ७० जागांवर आपले उमेदवार जाहीर केले आहेत. यांपैकी नवी दिल्ली मतदारसंघातून स्वतः मुख्यमंत्री अरविंद केजरीवाल तर पटपडगंज येथून उपमुख्यमंत्री मनीष सिसोदिया हे निवडणूक लढवणार आहेत. पक्षाने यंदा ८ महिलांना उमेदवारी दिली आहे.
उमेदवारांच्या नावांची यादी अंतिम करण्यासाठी आपकडून मंगळवारी पॉलिटिकल अफेअर्स समितीची बैठक आयोजित करण्यात आली होती. या बैठकीत अंतिम यादीवर शिक्कामोर्तब झाले. ‘आप’ने सर्व ७० जागांवर आपले उमेदवार जाहीर केले. गेल्या विधानसभा निवडणुकीत आपने ७० पैकी ६७ जागा जिंकल्या होत्या.
Aam Aadmi Party (AAP) releases the list of candidates for #DelhiElections2020. Chief Minister Arvind Kejriwal to contest from New Delhi, Deputy CM Manish Sisodia to contest from Patparganj. pic.twitter.com/Blkm5JX2tD
— ANI (@ANI) January 14, 2020
यावेळी माध्यमांशी बोलताना मनिष सिसोदिया म्हणाले की, बैठकीत ४६ विद्यमान आमदारांना पुन्हा तिकीट देण्याचा निर्णय घेण्यात आला. तर ९ जागांवर नव्या चेहऱ्यांना संधी देण्यात आली आहे. तसेच १५ जागांवर विद्यामान आमदारांचा पत्ता कट करण्यात आला आहे. यंदा ६ महिलांना ऐवजी ८ महिला उमेदवारांना संधी देण्यात आली आहे. तसेच ६ रिक्त जागांवरही नव्या लोकांना संधी देण्यात आली आहे.
दिल्ली विधानसभेसाठी ८ फेब्रुवारीला मतदान होणार आहे तर ११ फेब्रुवारी रोजी मतमोजणी होईल. यंदा भाजप, काँग्रेस आणि आपमध्ये मुकाबला होणार असून तिन्ही पक्षांनी दिल्ली काबीज करण्यासाठी जोरादार तयारी सुरु केली आहे.