शिवसेना भाजपा सत्तासंघर्ष सुरु असताना काँग्रेसचे कोल्हापूर दक्षिण विधानसभा मतदारसंघातील आमदार व माजी गृहराज्यमंत्री सतेज पाटील यांचे पुतणे नवर्निवाचीत आमदार ऋतुराज पाटील यांनी रात्री उशिरा शिवसेना पक्षप्रमुख उद्धव ठाकरे यांची मातोश्री निवासस्थानी भेट घेतली.
आमदार ऋतुराज पाटील यांनी रात्री 12 च्या सुमारास मातोश्रीवर भेट घेतली. दोघांमध्ये जवळपास दीड तास चर्चा झाली अशीही माहिती समोर येत आहे. मातोश्रीतून बाहेर निघाल्यावर ऋतुराज यांनी माध्यमांशी बोलण्यास नकार दिला. मात्र या भेटीमागचे कारण काय हे स्पष्ट झाले नाही.
कोण आहेत ऋतुराज पाटील…
ऋतुराज पाटील हे शिक्षण सम्राट ओळख असलेले डी. वाय. पाटील यांचे नातू आहेत. विधानसभा निवडणूक 2019 मध्ये पहिल्यांदाच ऋतुराज निवडणूक रिंगणात उतरले होते. तसेच पहिल्याच निवडणुकीत त्यांनी जोरदार विजय ही मिळवला. ऋतुराज पाटील माजी गृहराज्य मंत्री सतेज पाटील यांचे पुतणे आहेत. कोल्हापूर दक्षिणमधून ऋतुराज यांना उमेदवारी मिळाली होती. कोल्हापूर दक्षिण हाय-टेन्शन मतदारसंघ म्हणून ओळखला जातो. यावेळी ऋतुराज यांच्याविरोधात भाजपचे अमल महाडिक निवडणूक रिंगणात होते. या अटीतटीच्या लढतीत पाटील यांनी मोठ्या मताधिक्याने विजय मिळवला. तरुण आमदार म्हणूनही ऋतुराज पाटील यांचे नाव घेतले जाते.