मशिदीतून अजानचा आवाज सुरु होताच पंतप्रधानांनी भाषण थांबवलं!

महत्वाचे…
१. दक्षिण गुजरातमध्ये नवसारीतील सभेमध्ये झाला होता प्रकार २. यापूर्वीही अजानच्या वेळी मोदींनी थांबवले होते भाषण ३. अजान संपवल्यावर मोदींनी त्यांचे भाषण पुन्हा सुरु केले

नवसारी- गुजरातमध्ये निवडणुकीचा प्रचार ऐन रंगात आला आहे. या रणधुमाळीमध्ये स्वत: पंतप्रधान नरेंद्र मोदी यांनी प्रचारसभांचा धडाका लावला आहे. गुजरातमध्ये त्यांनी चार प्रचारसभा घेतल्या. यामधील तीन सभा सौराष्ट्र आणि एक सभा दक्षिण गुजरातमध्ये झाली. दक्षिण गुजरात येथील नवसारीतील प्रचारसभेला मोदी संबोधित करत असताना जवळच्या एका मशिदीतून अजानचा आवाज ऐकू आला. त्यामुळे मोदींनी दोन मिनिटांसाठी भाषण थांबवले.

पंतप्रधान मोदीं यांचे नवसारीतील सभेत भाषण सुरु असताना जवळील मशिदीतून अजानचा आवाज ऐकू आला. त्यामुळे मोदींनी त्यांचे भाषण दोन मिनिटांसाठी थांबवले. अजान संपवल्यावर मोदींनी त्यांचे भाषण पुन्हा सुरु केले. यावेळी त्यांनी जीएसटीवरुन काँग्रेसवर हल्लाबोल केला. जीएसटीचा उल्लेख गब्बर सिंग टॅक्स असा करणाऱ्या काँग्रेस उपाध्यक्ष राहुल गांधींवर त्यांनी टीकास्त्र सोडले. काँग्रेसचा जीएसटी म्हणजे ग्रँड स्टुपिड थॉट असल्याचे म्हटले.

• या आधीही पंतप्रधानांनी थांबवले होतं भाषण –

पंतप्रधान नरेंद्र मोदी यांचा या पूर्वीही असाच एक व्हिडिओ व्हायरल झाला होता. या व्हिडीओमध्ये पंतप्रधान नरेंद्र मोदींनी अजान सुरु होताच आपलं भाषण थांबवल्याचं दिसत होत. २७ मार्च २०१६ चा तो व्हिडीओ होता. उत्तरप्रदेशमधील निवडणूकीत तो व्हारल झाला होता.