नवी दिल्ली : जनतेसाठी केंद्र सरकारने चक्क १२५ रूपयांचं नाण आणलं आहे. सेल्फ-रियलायजेशन फॅलोशिपचे संस्थापक योगी परमहंस योगानंद यांच्या १२५ व्या जयंतीनिमित्त केंद्र सरकारकडून १२५ रूपयाचे नाणे जारी करण्यात आले. अर्थमंत्री निर्मला सीतारामन यांनी दिल्लीमध्ये १२५ रूपयांचे नाण्याचे लोकार्पण केलं. यामुळे आता बाजारात १२५ रुपयाचे नाणे व्यवहारात येणार आहे.
अर्थमंत्री निर्मला सीतारामन नाण्याचं लोकार्पण करताना म्हणाल्या की, ‘परमहंस योगानंद यांनी जगभरात भारताची मान उंचावली. त्यांनी जगभरातील लोकांना मानवतेविषयी जागृत करण्याचं काम केलं. जगभरातील लोकांना एकतेविषयी संदेश दिला. यावेळी अर्थ व कॉर्पोरेट व्यवहार राज्यमंत्री अनुराग ठाकूरही उपस्थित होते.
१२५ रूपयाच्या नाण्यात काय आहे विशेष…
१२५ रूपयाच्या विशेष नाण्याच्या समोरील बाजूला अशोकचक्र हे राष्ट्रीय बोधचिन्ह आहे. हिंदीमध्ये भारत तर इंग्रजीमध्ये इंडिया सह १२५ रूपये छापलं आहे. या नाण्याचं वजन ३५ ग्रॅम आहे. नाण्याच्या दुसऱ्या बाजूला परमहंस योगानंद यांचे छायाचित्र छापले आहे. त्यासोबतच हिंदी आणि इंग्रजीमध्ये ‘परमहंस योगानंद यांची १२५ वी जयंती’ आणि त्यांच्या जन्म-मृत्यूचं वर्ष नमूद करण्यात आलं आहे. ३५ ग्रॅमचं हे विशेष नाणं तयार करण्यासाठी ५० टक्के चांदी, ४० टक्के तांबे, पाच टक्के निकल आणि पाच टक्के जस्तचा वापर केला आहे.
