मुंबई: दिवसा जाणवणारी आर्द्रता आणि संध्याकाळनंतर खालावणारे तापमान यामुळे मुंबईकर संमिश्र वातावरणाचा अनुभव घेत आहेत. मुंबईत सोमवारपासूनच ढगाळ वातावरण होते. शहरात काही ठिकाणी आकाश भरून आले होते. वातावरणात मोठ्या प्रमाणात धुरकेही पसरले होते. शहरातील काही भागांमध्ये ओझरते सूर्यदर्शन झाल्याने दिवसभर ढगाळ वातावरण होते. वांद्रे-कुर्ला संकुल, बोरिवली, माझगाव, भांडुप परिसरात हवेचा दर्जा खालावल्याचे आढळून आले.
दिवसभर मुंबईतील अनेक भागांतील हवेचा दर्जा खालावला होता. ‘सफर’ या संस्थेने मंगळवारी नोंदवलेल्या आकडेवारीनुसार मुंबईतल्या बीकेसी, भांडुप, बोरिवली, माझगाव या भागातील हवेचा दर्जा वाईट स्तरापर्यंत खालावलेला होता. आरोग्यासाठी हानिकारक पातळीपर्यंत हा दर्जा वाईट असल्याची नोंद करण्यात आली. मंगळवारी सर्वसाधारण हवेच्या प्रदूषणाचा मुंबईतील निर्देशांक २७१ होता. मुंबईच्या किमान तापमानामध्ये लक्षणीय बदल झाला असून शहरात २१.५ अंश तर उपनगरांत १९ अंश सेल्सिअस तापमान मंगळवारी नोंदवण्यात आले. हवेचा दर्जा वाईट असल्यामुळे अशा प्रकारच्या हवामानात दमा, श्वसनविकार यांसह ताप येण्याचे प्रमाण वाढले आहे. त्वचेच्या संसर्गासह डोळे येण्याच्याही तक्रारी वाढत आहेत. खासगी व सार्वजनिक रुग्णालयांमध्ये येणाऱ्या रुग्णांमध्ये खोकला, सर्दी, घसादुखीचे प्रमाण सर्वाधिक असल्याचे दिसून आले आहे. या प्रकारच्या हवेत विषाणूंचा संसर्ग झपाट्याने होऊ शकतो. त्यामुळे संबंधित आजाराच्या लक्षणांकडे वेळीच लक्ष द्यायला हवे, असे श्वसनविकारतज्ज्ञ डॉ. विश्वास देसाई यांनी सांगितले.
ज्येष्ठ नागरिक, गर्भवती माता आणि लहान मुलांना या वातावरणाचा अधिक त्रास होऊ शकतो. अशा वातावरणामध्ये आरोग्याची पथ्ये पाळणे गरजेचे आहे. प्रदूषण असलेल्या ठिकाणी गाडी चालवल्यामुळे अथवा अधिक काळ अशा भागातून प्रवास केल्यामुळे अॅलर्जी होऊ शकते, असेही डॉक्टरांनी म्हटले आहे. तुरळक सरींची शक्यता दक्षिण कोकण, गोवा आणि दक्षिण मध्य महाराष्ट्रात तुरळक ठिकाणी बुधवारी ढगांच्या कडकडाटासह पाऊस पडण्याची शक्यता वर्तविण्यात आली आहे. राज्याच्या उर्वरित भागात हवामान कोरडे असण्याची शक्यता आहे. मुंबईत गुरुवारपर्यंत असे ढगाळ वातावरण राहण्याची शक्यता हवामान खात्याने वर्तवली आहे.
