मुंबई : मराठी सिनेसृष्टीतील अभिनेत्री केतकी चितळे विरोधात सोशल मीडियावर आक्षेपार्ह पोस्ट शेअर केल्याप्रकरणी पोलीस ठाण्यात गुन्हा दाखल करण्यात आला आहे. केतकीची आक्षेपार्ह पोस्ट सोशल मीडियावर व्हायरल झाल्यानंतर नवी मुंबईतील आंबेडकरी चळवळीतील कार्यकर्ते स्वप्निल गोविंद जगताप यांनी रबाळे पोलीस स्टेशन मध्ये तक्रार केली होती.
काय होती केतकीची पोस्ट…
केतकीनं १ मार्च रोजी रविवारी फेसबुकवर एक पोस्ट शेअर केली होती. यात तिनं अनेक धर्मांचा उल्लेख केला आहे. केतकीनं तिच्या पोस्टमध्ये लिहिलं आहे की, ‘नवबौद्ध, ६ डिसेंबरला फुकट मुंबई दर्शनास येतात, तो धर्म विकासासाठीचा हक्क’, आम्ही फक्त हिंदू,असा शब्द उद्गारला, तर घोर पापी, कट्टरवादी!? पण अर्थात चूक कुणा दुसऱ्यांची नाही, तर आमचीच आहे. आम्ही स्वतःच्यातच भांडण्यात इतके बिझी आहोत, आम्हाला आमच्यातच फूट पाडणारे नेते आवडतात आणि आम्ही त्यांना ती फूट पाडू देतो, की स्वतःचा धर्म आम्ही विसरतो.’ नवबौद्धांसंदर्भातल्या वाक्यावर आक्षेप घेत स्वप्निल गोविंद जगताप यांनी पोलीस ठाण्यात तक्रार केली होती. तक्रार दाखल केल्यानंतर केतकीवर अनु. जाती जमाती अत्याचार प्रतिबंधक कायद्यान्वये म्हणजेच ॲट्रॉसिटी प्रतिबंध कायद्याअंतर्गत गुन्हा दाखल करण्यात आला आहे.
अशा व्यक्तिंचा द्वेष नक्कीच आहे…
ब्राह्मण द्वेष, किंवा ब्राह्मण कसे श्रेष्ठ, यातच आम्ही इतके गुंतलो आहोत, की ‘मुसलमान, क्रिश्चन मिळून या ब्राह्मणांना हकलवून लावू’ असं ही म्हणतो. आपण तर आपल्या महापुरुषांनाही नाही सोडलं हो! आपण तर त्यांचीही वाटणी केली. छत्रपती शिवाजी महाराज आमचे आणि सावरकर तुमचे, आंबेडकर फक्त नवबौद्धांचे! आपली लायकी आपणच काढली, आणि अजूनही काढतोय, असंदी केतकीनं तिच्या पोस्टमध्ये म्हटलं आहे. मला कुठल्याही धर्माचा किंवा जातीचा द्वेष नाही, पण धर्म आणि जातीच्या आधारावर वाद निर्माण करणाऱ्या व्यक्तिंचा द्वेष नक्कीच आहे. अशी शेवटची ओळही केतकीनं तिच्या पोस्टमध्ये लिहिली आहे.
